حكاية الكذب من التراث الشفهي الحلبي

كتبت الباحثة/ سها شعبان _ الإمارات أبو ظبي

قبل وجود وسائل التواصل الاجتماعي وقبل التلفزيون وقبل حتى الكهرباء …
في البيوت و في السهرات ودون الحاجة الى وجود حكواتي متخصص … كان كل اجتماع أو سهرة يحظى على الأقل بشخص مميز ماهر في رواية الحكايات .. وجذب الحاضرين … فلأسلوب رواية الحكاية عامل الجذب الأكبر لشد المستمعين .. أحببت في أول أيام العيد أن ابعث هذه الأجواء وتلك العفوية .. وأحببت أن أنقل لكم حكاية مشهورة بحلب .. هي حكاية هاربة من كل معقول أو كل ماقد يصدق .. حكاية الكدب .. استحضروا كل اللهجة الحلبية .. تفرغوا وتسلوا على طريقة أجدادنا ..
حكاية الكذب *:
كان ياماكان في قديم الزمان نحكي إلا نّام إلا نصلي على بدر التمام ؟
نحكي ؟ منحكي ..

هذا بزماناتو كان في ملك عندو تلات ولاد اجا الولد الكبير لعند ابوه وقال لو: يا يوب بدك تشدلي تجرة .

قال لو الملك : أنت أمير ابن ملك لازمك مصاري حتى تشد تجرة؟

قال لو الأمير: أنا اشتهيت أجرب حظي … وأشتغل متل ماغيري بشتغل .

وافق الملك وحمل ابنو بضاعة وزوادة وقلّو الله معك .

راح هذا ابن الملك أخد درب طْريقو ومشي مشي بلاد تشيلو بلاد تحطو دي لوصل لبلد مافيا الدومري البيوت فاضية الدكاكين مفتوحة ومافيا حدا … دي لشاف من بعيد بصيص ضو لحقو لوصل لقصر كبير سياح نياح … دخل على القصر شاف زلمة ختيار قيعد عند بركة مي كبيرة .. قرب عليه ..

قال لو: السلام عليكم .

قال لو : وعليكم السلام .

سأل لو الشب : اش قصة هل بلد ما فيها حدا؟

قال لو: هل بلد بلدي ويللي بحكيلي قصة ما تصنفت من قبل … بوهبه ملك البلد .

سأل لو الشب : شلون يعني ما تصنفت ؟

قال لو الملك : حكاية كذب من أولا لإيخرا.. ويللي بجيب كلمة مافيا كذب بقطعلو راسو ..

وطمعوا كل الناس بملكي .. وبلشوا يجوا ليحكولي حكايات .. وكل مين يصل لكلمة ماهي كذب بصفق لزبانيتي بجوا بياخدوه وبقطعوا راسو .. دي لعمرت قلعة من روس الخلق ..
هاد الشب تحمس وقال للملك أنا بحكيلك قصة ماتصنفت من قبل …

قال لو الملك هات لنشوف ..

قام بدي الشاب حكايتو وقال : كان ياما كان بقديم الزمان كان في ملك ..

قام غضب الملك وقال لو : ليش في قبلي ملك؟ وصفق طلعوا اتنين أخدوا الشب وراحوا ..

منرجع مرجوعنا للملك وولاده التنين البقيانين ..

أجى الابن الوسطاني وقال لأبوه .. يايوب بدي تشدلي تجرة ..

قال لو الملك : أنت أمير ابن ملك لازمك مصاري حتى تشد تجرة؟

قال لو الأمير: أنا اشتهيت أجرب حظي … وأشتغل متل ماغيري بشتغل .

قال لو : طيب منستنى ليرجع أخوك نشوف اش صار معو ..

قال لو : خليني أجرب حظي …

وافق الملك وحمل ابنو بضاعة وزوادة وقلّو الله معك .

راح هذا ابن الملك أخد درب طْريقو ومشي مشي بلاد تشيلو بلاد تحطو دي لوصل لبلد مافيا الدومري البيوت فاضية الدكاكين مفتوحة ومافيا حدا .. موضع ماوصل أخوه من قبل وجرى عليه اللي جرى لأخوه ..

منرجع مرجوعنا عند الملك وابنو الصغير اللي بقي عندو ..

راح الولد الصغير عند أبوه وقال لو : يايوب بدي تشدلي تجرة ..

قال لو الملك : أنت أمير ابن ملك لازمك مصاري حتى تشد تجرة؟

قال لو الأمير: أنا اشتهيت أجرب حظي … وأشتغل متل ماغيري بشتغل .

قال لو : طيب منستنى ليرجع أخوتك نشوف اش صار معن ..

قال لو : خليني أجرب حظي …

وافق الملك وحمل ابنو بضاعة وزوادة وقلّو الله معك .

راح هذا ابن الملك أخد درب طْريقو ومشي مشي بلاد تشيلو بلاد تحطو دي لوصل للبلد اللي وصوا الها أخوته وقابل الملك وحكى له حكاية البلد ..

قام تحمس الابن الصغير وقال لو: أنا بحكيلك الحكاية .

قال لو: اتفضل .

وبدي ابن الملك الصغير الحكاية :

انا شفت بعيني جحش من على راس السروة طار وفيل ينقر خشب والفسفسة نجار

كنا تلاتة في بتة نسفنا الهوا صرنا ستة ولله يا ملك الزمان رحنا عل حمام واحد داب وراح بين الاجران والتاني داب وراح في البلوعة والتالت ساخ بميت السخنة

طلعنا من الحمام واحد اعمى و واحد اعرج وواحد اطرش الاطرش قال عم بسمع حس بقه بسماها الاعمى قال انا بعيني أراها الاعرج قال يالله لنركد وراها ركدنا ماركدنا لقينا بدربنا قلعة وسور واللحم والشحم عالاسطحه ونحن طالعين من الحمام جوعانين شفنا مرا عم تبيع لحمة ولله رحنا يا ملك الزمان لعند المرا وسألناها بشقد كيلو اللحمة قالت لنا للزناكيل بخمسة وللفقرا بعشرا قلنالا هاتي من تبعت الزناغيل ورحنايا ملك الزمان لنطبخ اللحمة ما لاقينا طنجرة شفنا وحدة مرا قاعدة قدام بيتها رحنا لعندا وقلنالا عندك طنجرة مشان نطبخ اللحمة قالتلنا عندي طنجرة بتخرق اللحمة وبتضل المرقة قلنالا معلش هاتيا ولله يا ملك الزمان اخدناها ورحنا طبخنا اللحمة خلصنا ضلت المرقة ولله فتينا فيها خبزة واكلناها ولله يا ملك الزمان انا ما شبعت رحت اشتريت بيضتين وع الطريق وقعت وحدة منها وانكسرت قام طلع منها ديك عشيري هل قد قدو ولله ياملك الزمان قلت لحالي اش بدي أساوي فيه قام عدا واحد وقلي حمّل عليه طحنات قلتله ماشي ولله يا ملك الزمان رحت من بستان لبستان قام انقسم ضهروا ولله عدا واحد وقلي جيب جوزة حرقا وطحنا وفركلوا ضهرو للديك ولله يا ملك الزمان جبت جوزة حرقتا وطحنتا وفركتلوا ضهروا قام طلعت على ضهروا شجرة جوز هل كبر كبرا ولله يا وملك زمان كبر هل جوز عقد هل جوز لميت هل جوز بس ضل كم جوزة فوق بل عالي قمت مسكت كمشة تراب وشلفتا عليهن قام انمددتلك ارض فلاحة هل كبر كبرا قلت لحالي اش بدي ازرعا قام عدا واحد وقلي ازرعا سمسم ولله يا ملك الزمان زرعتا سمسم قام كبر هل سمسم عقد هل سمسم لميت السمسم عديت هل سمسم لاقيتون ناقصين سمسماية دورت هون وهون قمت لاقيتا بتم النملة ولله يا ملك الزمان انا اشد وهي تشد لبين ما طلع بايدي الربع وبتما التلات الارباع ولله يا ملك الزمان اخدت هل ربع سمسماية عصرتا قام طالعت اربعين جحش محمل بزيت السيرج بعتون وربحت فيون مبالغ قلت لحالي اشو بدي ازرع هالارض قام عدا واحد وقلي ازرعها جبس ولله يا ملك الزمان زرعتا جبس كبر هل جبس عقد هل جبس قام عدا فارس قلي اقطعلي جبسة قلت لحالي يا ملك الزمان اذا قطعتلوا جبسة رح تخسر قمت قلتلوا ما معي موس قام قلي خود سيفي ولله يا ملك الزمان اخدت هل سيف وجيت لاقطع الجبسة قام ضاع السيف بشرش الجبسة قلي سيفي ما سيفي بدي سيفي قمت قطعت راسي وحطيتو ناطور ع الأرض ونزلت بلجبسة لادورلو على سيفو ولله يا ملك الزمان صرت ادور هون وهون قام ادن الجامع قلت لحالي بصلي وبرجع بكمل دوارا عل سيف ولله يا ملك الزمان دخلت لاصلي قمت شفت راسي عم يخطب ع المنبر قلتلون راسي وعلقت معن راسي ما راسك قاموا قالوالي بس انخلص صلاه منطلع عل المادنة ومنشلفوا اذا وقع عليك بكون الك واذا وقع عل ارض بكون مو الك قلتلون ماشي ولله يا ملك الزمان خلصنا صلاه وطلعوا عل مأدنة وشلفوه قام وقع علي قمت اخدت راسي ومشيت وانا ماشي شفت السيف عم ينباع بمزاد بخمسة بعشرة بعشرين قلتلون سيفي وعلقت معن سيفي مو سيفك قالولي امشي لعند القاضي ولله رحنا لعند القاضي شفت لفة القاضي قرن زلابية قمت اكلتو قام عصب القاضي وحبسني شفت حيطان السجن بسطيق اقشرته واكلته وحدايد الطاقة جوق ملبن كمان أكلتن ولا ألاقيلك ورا الطاقة نهر كبة بلبنية قمت زتيت حالي فيو انحرقت من هون التدعت من هون اكلت من هون شبعت وطلعت .
قام قال لو الملك : هي قصة ما تصنفت بتجي بكرا بنفس هل وقت بتلاقيني ميت بتغسلني وبتكفني بتصفق بيطلعوا اتنين بياخدوني وبروحوا ومن بعدها بتصير هل بلد بلدك .

راح هذا الولد ورجع تاني يوم شاف الملك ميت غسلووكفنو وصفق طلعوا تنين اخدوه وراحوا .. صار يتمشى بهالبلد شاف كهف عم يطلع منو صوات دخل عليه هلّي عم يموت هلّي عم ينازع ومن جملتون اخواتو هاد سقاه سمنة وهاد سقاه زبدة وقام صحوا وتصحصحوا وبعت مكتوب لابوه قا لو فيو انو انا صرت ملك بفلان بلد واخوتي معي
وع هاك وهنّك طاب عيشك وبقّاك توتة توتة خلصت الحتوتة منيحة الا مفلوتة ..

* هذه الحكاية من الحكايات القديمة المشهورة بحلب … يقولها الراوي دون تباطؤ أو توقف وهو يخلق بذلك عنصر التشويق والجذب .. الرواية التي سردتها عليكم هي تمامًا مثلما كنت أسمعها من جدتي لأمي رحمة الله عليها وقد نقلها السيد محمد كبة .. ورممتها من ذاكرتي كما أني رممتها بجملتين واحدة من رواية العلامة خير الدين الأسدي وقد نقلها لي مشكورًا الأستاذ عاطف شيخوني وجملة من رواية الأستاذ محمد حميدي كما رواها في مجموعة موسوعة الأمثال الشعبية الحلبية .. الجدير بالذكر ان هذه النسخة لها مقدمة ونهاية بهذا هي تختلف عن رواية العلامة الأسدي تحت عنوان ( قلعة من روس ) .

شارك هذا المقال:

جميع الحقوق محفوظة لموقع جورنال الحرية

تصميم وتطوير شركة Creative In Design